Brad Mehldau

Əsl adı Bredford Aleksandr Meldau (orijinal ad – Bradford Alexander Mehldau) olan Bred Meldau (1970-ci il avqustun 23-ü, Jacksonville, Florida, ABŞ-da anadan olub) ifalarına rok elementləri daxil etməklə, öz nəslinin ən təsiredici caz sənətçilərindən birinə çevrilmiş amerikalı caz pianoçusudur.

 

Caz pianoçusu Bred Meldau 1990-cı illərin əvvəllərindən başlayaraq geniş miqyasda studiya yazıları və canlı çıxışlar etməyə başlayıb. Meldaunun illər ərzində ən davamlı yaradıcılığı trio şəklində olub. 1996-cı ildən başlayaraq, onun qrupu Uorner Bros. leyblı üzərindən “The Art of the Trio” (Trio sənəti) adlı 5 albomdan ibarət seriya buraxıb (2011-ci ilin sonlarında Nonesuch tərəfindən 5 disklik qutu seti kimi yeni qablaşdırmada yenidən satışa çıxarıldı). Eyni dövrdə, Meldau, həmçinin, “Elegiac Cycle” (Elegiya Dövrəsi) adlı həm solo piano, həm də trio ifalarından ibarət “Places” (Məkanlar) albomunu təqdim edib .

 

Musiqi şəxsiyyətində ikililik barındıran Meldau ilk növbədə improvizatordur və spontan bir musiqi ideyasının birbaşa, real zamanda ifadəsindən ortaya çıxan təəccüb və heyrət onun üçün çox əzizdir. Amma musiqinin formal arxitekturası da Meldau üçün dərin heyranlıq mənbəyidir və onun ifa etdiyi hər bir şeydə öz izlərini göstərir. Ən ilhamlı ifalarında musiqi düşüncəsinin faktiki formasının özü onun üçün ifadə aləti funksiyasını daşıyır. O, ifa etdikcə fikirlərinin hansı şəkildə açıldığını və özlərini hansı sıralama ilə bəyan etdiklərini dinləyir. Hər mahnının aydın hiss olunan süjeti var və bu süjet özünü başlanğıcda və  sonda göstərə və ya ümumiyyətlə, qəsdən sərbəst şəkildə buraxıla bilər. Meldaunun şəxisiyyətinin iki tərəfi – improvizator və formalistlik bir-birindən qidalanır və nəticə əksər hallarda idarə olunan xaosu xatırladır.

 

Yaradıcılığına təsir etmiş Kiz Cerret (Keith Jarrett) kimi Meldau da solo pianoçu kimi həssaslıqla ifa olunan kədərli balladalardan tutmuş, harmonik olaraq zəngin rapsodiyalara qədər dəyişən janrlarda improvizator kimi mükəmməl bacarıqlarını nümayiş etdirib. Onun repertuarı eklektik idi: O, Radiohead və Paul Simon da daxil olmaqla pop ifaçılarının mahnılarını, caz standartlarınə, həmçinin, öz mahnılarını ifa edirdi. “Elegiac Cycle” (1999), “Live in Tokyo” (2004) və “Live in Marciac” (2011) albomları onun soloçu kimi virtuozluğuna və çoxşaxəliliyinə dəlalət edirdi.

 

Buna baxmayaraq, caz idioması Meldaunun iddialarını bütünlüklə ehtiva edə bilməz. İllər boyunca Yohan Brams və Robert Şuman kimi klassik bəstəkarlar tez-tez onun ifa üslubuna təsir ediblər.

 

Onun musiqilərini müxtəlif filmlərdə eşitmək olar, bunlara Stenli Kubrikin  “Qapalı Gözlər” və Vim Vendersin “Milyon Dollarlıq Otel” filmləri də daxildir. O, həmçinin, Fransız filmi “Ma Femme Est Une Actrice” (“Mənim qadınım aktrisadır”) üçün orijinal saundtrek də yazıb.

 

 

Pop prodüseri Con Brayonla “Largo” (2002) və “Highway Rider” (2010) albomlarında və gitaraçı Pət Mitini ilə “Metheny Mehldau” (2006) və “Quartet” (2007) albomlarında əməkdaşlığı Meldaunu yeni yaradıcı istiqamətlərə aparıb.

 

Brad Meldau ilk Qremmi mükafatını “Finding Gabriel” (Qabrieli tapmaq) albomu ilə 2020-ci ildə “Ən Yaxşı İnstrumental Caz albomu” kateqoriyasında qazanıb. Bu albomda Meldau piano, sintezator, perkussiya və Fender Rhodes alətində həm ifa edir, həm də oxuyur. Albomda Ambrose Akinmusire, Sara Caswell, Kurt Elling, Joel Frahm, Mark Guiliana, Gabriel Kahane, Becca Stevens və başqaları qonaq qismində iştirak edir. AP albom haqqında “Dövrümüzün saundtreki” deyə bəhs edir. “Sözsüz vokalların mürəkkəb istifadəsi heyranedicidir,  gözəl səsini bu albomda ortaya çıxaran Meldau özü də ifaçıların sırasındadır. Məlahətli melodiyalar albomda bolluq təşkil edir.”

Mətnin yazılmasında Wikipedia, Encyclopedia Britannica, Brad Mehldau’nun şəxsi saytı və Grammy mükafatlarının saytındakı məlumatlardan istifadə olunub.

Salam, biz VarYoxuq. Bizi birləşdirən bir dəyər var – incəsənət və mədəniyyətimizi fərqli rakurslardan göstərmək və inkişaf etdirmək istəyi. Biz keçmişin mədəni və incəsənət nailiyyətlərinin kölgəsində gizlənmək istəmirik, yeni uğur, yeni təşəbbüs, qısası yeni nəfəs axtarırıq.

Fəaliyyətimizin ilk 2 ilində müxtəlif şirkət və təşkilatlardan maddi dəstək alsaq da, son 1 ildir ki, özümüz özümüzü kommersial layihələrlə maliyyələşdiririk. Təəssüf ki, bu imkanlar həmişə əlçatan deyil və artıq siz sadiq izləyicilərimizə üzümüzü tutmaq məcburiyyətindəyik. İndiki məkanımız bizim üçün sadəcə iş yeri deyil. Bura həm müxtəlif tədbirlərimizi, canlı yayımlarımızı etdiyimiz studiyadır, həm də bir araya toplanmaq, müxtəlif ideyalar arasında breynstorminq etmək və nəticədə keyfiyyətli, faydalı işlər görmək üçün komandamızı birləşdirən yaradıcı məkandır. Hal-hazırda məkan xərcləri və bu kimi məsələlər üçün dəstəyinizə ehtiyacımız var. İtirsək, artıq əvvəlki kontentlər bizdən asılı olmadan zamanla ləngiyəcək və bəlkə də davam edə bilməyəcək. İnanırıq ki, siz də bizim kimi bunu istəməzsiniz. Ona görə də bizə dəstək olmaqdan çəkinməyin.

Bunlar da xoşunuza gələ bilər

Leave a Reply

Sizin e-poçt ünvanınız dərc edilməyəcəkdir.