Elşən Baba 1993-cü ildə Quba rayonunun Alpan kəndində doğulmuşdur. Təhsili ilə bağlı olaraq 2011-ci ildə Bakıya köçən fotoqraf Azerbaycan Texniki Universitetinin Energetika fakultəsini bitirmişdir, ixtisasca mühəndisdir. Həvəskar rəssamlıqla məşğul olan Elşən bir neçə il karikaturalar çəkmiş, 2013-cü ildən isə fotoqrafiya öyrənməyə başlamışdır, həmçinin, yerli redaksiyaların birində fotomüxbir kimi çalışmışdır.
Hal-hazırda atası, anası və sevgilisi ilə birlikdə qurduqları, betondan hazırlanan müxtəlif gülqabılar dizayn edərək satışa çıxardıqları “Künc” adlı kiçik ailə biznesinin rəssamlıq və foto işlərini öz üzərinə götürmüşdür.
“Hiss edirəm ki, insan həmişə axtarışdadır. Hər şeyi yoxlamaq, təcrübə etmək arzusu insana çox şeyi kəşf etməyə sövq edir. Gördüyüm işlər insanların həyatlarına xoş müdaxilələr etməyə imkan yaradır.”- deyə fotoqraf bildirir.
“Qoşulma” fotoseriyasının fotolarını 2015-2017-ci illərdə çəkmişdir. Layihədəki bağlılıq bir-birini vizual olaraq təqib edən, tamamlayan xətlər və obyektlər üzərində qurulub.
